Скопје –   Во четврток, на 11-ти април, почнувајќи од 19:00 часот, во  „Буква“ ќе се случи настанот „Лиминал“.

Лиминалната естетика, која е премисата на овој настан, е поим изведен од латинскиот збор „лимен“ што значи праг. Таа се однесува на период на транзиција, двосмисленост и неодреденост, каде традиционалните граници и структури се распуштаат, дозволувајќи нови форми на искуство и смисла да процветаат. Во уметноста и културата, лиминалната естетика е често проследена со елементи на носталгија, сонувачки пејзажи и преклопување на временски периоди.

Настанот ќе предложи микс од dreamcore и vaporwave музика, подготвен од DJ Marko Nikolov, кој ветува да ги спои овие две интригантни елементи на едно  место. Неговиот музички избор е најавен како патување низ времето каде носталгијата среќава футуризмот и каде секоја нота остава одек на далечни соништа.

Додека музиката ќе креира аудитивен пејзаж на настанот, Јована Ѓерасимовска ќе се погрижи за гастрономскиот дел со претставување на својата нова линија коктели. Овие пијалоци, црпени од „тајната и лиминална книга на рецепти“, се најавуваат како напитоци кои ќе ги разматат границите помеѓу реалноста и фантазијата, ветувајќи уникатно и зачудувачко искуство за сите присутни.

Настанот во „Буква“ го претставува креативното срце на Скопје. Влезот е отворен за сите, со или без Facebook профил, па затоа запишете го во вашиот календар и бидете подготвени да ја оставите реалноста зад вас за една вечер. Само малку.