Македонската кореографска платформа дебитира вечерва во МКЦ: Глас за танцот

Вечерва, на 9 јуни во 20:00 часот, во Младинскиот културен центар (МКЦ), започнува ново поглавје за современиот танц во Македонија. Во рамки на Перформанс Платформа Фестивал (ППФ) 2025 – јунска едиција, организиран од Локомотива, ќе се одржи првото издание на Македонската кореографска платформа (МКП) – пионерска иницијатива што го става танцот во центарот на вниманието.

Зад оваа платформа стојат кураторките Биљана Тануровска-Ќулавковски и Викторија Илиоска, кои ја иницираа МКП со визија да создадат простор за новата генерација македонски кореографи да ја споделат својата работа, ресурси и визија – но и да упатат гласен повик за подобри услови во секторот.

Во првото издание на МКП учествуваат седум кореографи со различни уметнички пристапи, но заедничка посветеност кон танцот како форма на истражување, израз и отпор:

Ивана Балабанова, Дејан Битровски, Адријана Данчевска Ровчанин, Теодора Ежовска, Александар Георгиев, Тереза Лазарев и Александра Петрушевска.

Настанот нема да биде само уметнички, туку и политички чин. Македонската кореографска платформа не е само сцена за изведби, туку и простор за соработка, споделување, критика и промена. Корографите во рамки на МКП отворено се обратија до институциите со повик за системска поддршка на современиот танц и подобри услови за работа на независната сцена.

Публиката ќе има можност да присуствува на презентации од 20 до 30 минути, каде ќе се прикажуваат завршени перформанси, работни процеси или истражувачки формати, со цел да се добие поширока слика за тоа што значи да се биде кореограф денес во Македонија.

Секој ден ќе завршува со отворен разговор со уметниците, модериран од Нефели Јоти и Калиа Димитрова, со фокус на контекстот, предизвиците и можните насоки за иднината на танцот.

МКП не само што го активира локалниот танцов сектор, туку и го поврзува со поширокиот европски дискурс за перформанс и работнички права – поставувајќи ја македонската сцена на мапата на иновативните и ангажирани културни практики.

Ова не е само перформанс. Ова е движење.