БУКВАЛНО ЏЕЗ: Прво издание на скопскиот фестивал кој ветува спој на култура и ритам

Скопје ќе биде домаќин на првото издание на фестивалот БУКВАЛНО. ЏЕЗ., кој ќе се одржи од 19 до 25 мај 2025 година во културниот центар „Буква“. Овој нов фестивал ветува сеопфатна програма која ќе ги обедини љубителите на џезот и културата, нудејќи им богата палета на настани кои ќе се одвиваат во амбиенталниот простор и двор на „Буква“.

Фестивалот ќе понуди интересна комбинација од предавања, изложби, проекции и, секако, многу џез музика. Сите настани се отворени и бесплатни за сите, со цел да се овозможи достапност до квалитетна културна содржина за широката публика.

Што може да очекувате на БУКВАЛНО. ЏЕЗ.?

Програмата на фестивалот е внимателно курирана и ги опфаќа сите аспекти на џез културата, но и нејзината поврзаност со другите уметности:

Понеделник (19 мај) ќе започне со предавањето на Владимир Мартиновски на тема ,,Џез: звук, слика, збор”, проследено со отворање на изложбата ,,Jazz” на уметниците Диме Темков и Лучка Кошчак, со ритмични илустрации од Михаил Парушев. Вечерта ќе заврши со џез музика во изведба на составот Zulu 3.4.

Вторник (20 мај) е резервиран за «Џез вињети» со Александар Прокопиев, а вечерта ќе настапи џез составот Swing 42.

Среда (21 мај )ќе понуди проекција на ,,За џезот со душа” селекција на џез анимации од Марија Савелева, а вечерта ќе уживаме во звуците на Хот Џез Оркестар.

Четврток (22 мај) ќе имаме можност да ја проследиме ,,Азбука на скопскиот џез” со Кирил Темков, а вечерниот џез сет ќе го преземат Игор Спироски и Шурбе.

Петок (23 мај ) ќе биде ден за ,,Шпаклофонија”— инструментални експерименти со Владимир Лукаш, Виктор Танасковски и Тома Димовски, а вечерта ќе настапи Taxi Consilium.

За време на викендот, сабота (24 мај)ќе се одржи ликовна импровизација ,,Џез во боја” со Доротеј Нешовски, а вечерта ќе свири Odron Ritual Orchestra.

Фестивалот ќе заврши во недела ( 25 мај) со танцов мастер-клас ,,Дај од џезот” со Билјана Грозданова, Венус, проследено со вечерно џез дружење со Звук Караџиќ.

Организаторите на БУКВАЛНО. ЏЕЗ., Андреј Јованчевски, Анастасија Овчаренко и Александар Сандревски, заедно со тимот за визуелен дизајн Марија Савелева и Александар Савелев, и звучниот дизајнер Владимир Голоухов, создадоа програма која има за цел да го збогати културниот живот во Скопје.

Поддржи го џезот. Буквално.

Иако сите настани се бесплатни, организаторите овозможија начин за поддршка на фестивалот преку симболични донации. Сите собрани средства ќе бидат наменети за реализација на програмата и за развој на квалитетната културна сцена во градот. Доколку сакате да го поддржите фестивалот, можете да го направите тоа на следниот линк: https://drugastrana.mk/event/bukvalno-jazz/

Првото издание на БУКВАЛНО. ЏЕЗ. е поддржано од генералниот партнер Ford Trucks, како и од пријателите на фестивалот Colenco, Ponir, Симпозион, MultiQi, Badel, Винарија Попов и V'K Craft Distillery.