Емотивна промоција на книги од творештвото за возрасни на Оливера Николова

Вчера(29.03) Оливера Николова - со која децата чиј мајчин јазик е македонскиот се описменуваат - беше крунисана како „книжевна мајка на сите македонски писателки„ на нејзината промоција - таа круна колективно доделена од голем дел од новата генерација писатели и издавачи. Читајќи го нејзиното излагање две работи скокнаа од текстот. Првиот - „синдромот на натрапник„. Оливера Николова почнува со „ Многу би сакала да верувам дека го заслужувам овој момент. Ова што се случува овде. Верувајте ми, тоа е едно чувство со кое се борам вечерва„.

Колку и да шокира, сепак после не толку долго разгледување во себе на тоа „како може тоа да се случило„ и е сосема разбирливо. Тие претргања се често моторот и силата која го вежба креативниот дух.

Втората работа: и покрај очекувањето на формалноста прикладна за промоции, изненадувачки, Николова ни́ се обрати отворено и со доза интимност.

Модератор на настанот беше уредничката на изданијата, Оливера Ќорвезироска, која го напиша и поговорот за „Кадифената покривка“

а останатите нови поговори ги напишаа Елизабета Баковска (поговор за „Куклите на Росица“), Румена Бужаровска („Куќичка“), Владимир Мартиновски („Тромбот“), Калина Малеска („Адамовото ребро“), Јелена Лужина („Збогум Вано, Ванке...“), Гоце Смилевски („Пешаци по црни полиња“), Никола Гелевски („Белиот чад“), Владимир Јанковски („Лева комора“) и Катица Ќулавкова („Вежби за Ибн Пајко“), Кица Колбе (поговор кон „Тесна врата“) и Давор Стојановски („Песот со тажен поглед“).

Реобјавените книги на Оливера Николова ќе бидат достапни во сите книжарници на „Литература.мк“ и онлајн преку www.literatura.mk