Перформанс Платформа фестивал (ППф) 2025 – октомври/ноември: телото како простор на трансформација

Перформансите BLISS и CODOMESTICATION, фанзин-сесија и меѓународни уметнички соработки го сочинуваат октомврискиот дел од ППф 2025.

Локомотива – Центар за нови иницијативи во културата и уметноста со задоволство ја најавува есенската програма на Перформанс Платформа фестивалот (ППф), која ќе се одвива во октомври и ноември 2025 година.

Ова второ, есенско издание го продолжува феминистичкиот кураторски пристап на фестивалот, насочен кон споделување ресурси, создавање врски меѓу уметници и теоретичари и развивање на заеднички простори на грижа, телесност и со-живеење. Додека јуниското издание беше обликувано од еко-феминистички перспективи, октомвриската програма се насочува кон прашањата на репродукцијата, колективното живеење и иднините во создавање.

BLISS – телото како метаморфоза

Првиот дел од програмата ќе го претстави перформансот BLISS на полската кореографка Рамона Нагабчињска, кој ја истражува бременоста како трансформативна и несигурна состојба, но и како искуство на мајчинство.

Покрај изведбата, Нагабчињска ќе одржи и работилница „Image, Matter, Presence“, на која учесниците ќе го истражуваат односот меѓу сликата, сензацијата и телото.

Перформансот и работилницата се дел од проектот (M)others on tour, реализиран во соработка со повеќе европски партнери.

CODOMESTICATION – уметност на заедничко родителство

Во ноември, фестивалот ќе ја претстави претставата CODOMESTICATION на уметничкиот дуо Крот Јурак и Алекс Бејли (Естонија/Велика Британија, со седиште во Австрија).

Првично создаден заедно со нивното дете, перформансот истражува алтернативни начини на циркулација и колективно родителство, без физичко патување на уметниците.

Во Македонија, делото ќе го изведе Симона Спировска со своите деца, во рамките на турнејскиот концепт showing without going, кој го преосмислува односот меѓу локалниот контекст и меѓународната соработка.

Фанзин во процес – колективна публикација и отворен уметнички дијалог

Есенската програма се надоврзува и на пролетното издание на фестивалот, посветено на (не)конференцијата „(Еко)Феминизам во практиката/ите“, преку иницирање на фанзин во процес – колективна публикација која ќе се обликува како „вежбанка“ за идни соработки и истражувања.

Во отворената сесија „Фанзин во процес“, уредничките Биљана Тануровска-Ќулавковски и Нефели Ѓоти, заедно со дизајнерката Софија Цветковиќ, ќе водат јавна работилница во која ќе се финализира изданието преку ко-креирање и споделено авторство.

Телото како простор на грижа и иднина

Со теми што се движат од бременоста и мајчинството, преку пореметувањето на телесната слика, до колективното родителство и создавањето на фанзин, есенското издание на ППф ја продолжува посветеноста на феминистички и плуриверзални практики.

Кураторките Викторија Илиоска и Биљана Тануровска-Ќулавковски поставуваат суштинско прашање:

„Како перформансот може да ги преосмисли условите на живеење, грижа и создавање – поинаку?“

Програма – октомври 2025

9 октомври @ МКЦ, Скопје

• 12:00–16:00 | Џебно кино – Сесија „Фанзин во процес“: отворена работилница и повик за ко-авторство.

• 20:00 | МКЦ – BLISS, танцов перформанс на Рамона Нагабчињска.

  
  

  По изведбата ќе следи разговор со Ирена Цветковиќ, независна истражувачка во областа на родовите студии.

10 октомври @ Факултет за драмски уметности

• 15:00–17:00 – Image, Matter, Presence, работилница со Рамона Нагабчињска (дел од програмата КУЛТРЕНИНГ).

Ноември 2025

• Премиера на CODOMESTICATION со Симона Спировска и семејството, во рамки на проектот showing without going.

  
  

  (Точниот датум ќе биде објавен наскоро.)

Есенското издание на ППф 2025 е поддржано од проектот „Култура за развој“ на Владата на Швајцарија, Performance Situation Room (LLB 3) финансиран од Креативна Европа, како и од Perform Europe, Фондација Хајнрих Бел, Министерството за култура и туризам на РСМ и Гете-институт Скопје.